ഒറ്റ കുർബാന

ഒറ്റ കുർബാന

“അപ്പന് വേണ്ടി ഒരു കുർബാന ചോല്ലണമല്ലോ കപ്യാരെ”

“അപ്പൻ മരിച്ചിട്ടിപ്പം എത്ര വര്ഷം ആയി?” കപ്യാര് ചോദിച്ചു

“പത്തു വര്ഷം”

“അപ്പം കാശു ഇച്ചിര കൂടും”.

കപ്യാര് കമ്മിഷൻ കണക്കു കൂട്ടി ഒരു മുഴം നീട്ടി തട്ടി.

“അതെന്താ അപ്പന്റെ ആത്മാവിനു റിപയർ വല്ലതും?”. 

വലിയ വിവരം ഒന്നും ഇല്ലെങ്കിലും ആണ്ടു കുർബാനയുടെ പണം കൂടുതൽ ആകും എന്ന് പറഞ്ഞത് അയാള്ക്ക് അങ്ങോട്ട്‌ ദഹിച്ചില്ല. ഒന്നുകില്ലേലും അപ്പൻ മരിച്ചിട്ട് കൊല്ലം പത്തു കഴിഞ്ഞു. 

പശൂം ചത്ത്‌ മോരിലെ പുളീം പോയി. പിന്നെ ഇങ്ങനൊരു ചടങ്ങ് നാട്ടു നടപ്പ് ആയതു കൊണ്ട് ആണ്ടോടാണ്ട് നടത്തുന്നൂ അത്രേയുള്ളു.

കപ്യാർക്കാ സ്റ്റേറ്റ്മെന്റ് തീരെ പിടിച്ചില്ലാന്നു തോന്നുന്നു.

“ങ്ഹാ കളി കള! ഇപ്പം റേറ്റ് കൂടുതലാ…” 

എല്ലാവർക്കും അപ്പൻ സുഖമായി സ്വർഗത്തിൽ തന്നെ വാഴണം.കാശു ചോദിക്കുമ്പം പുളി കടിച്ചു തിന്നുന്ന പോലെ മുഖഭാവം.

“എന്റപ്പൻ സ്വർഗത്തിൽ പോയിക്കാണുവോ കപ്യാരെ?”

“അതിപ്പം അങ്ങിനെ ഗ്യാരന്റി തരാൻ പറ്റുവോ?” “ജീവിച്ചിരുന്നപ്പോൾ അതിയാൻ ചെയ്ത പ്രവർത്തികളും പിന്നെ നിങ്ങൾ മക്കളുടെ പ്രാർത്ഥനയും നേർച്ചയും ഒക്കെ പോലെ ഇരിക്കും. “ 

കപ്യാര് എപ്പഴും ഒരു പിടി പിടിച്ചേ എന്തും അങ്ങോട്ട്‌ പറയത്തൊള്ളൂ.

“പിന്നെ ഞാനീ ആണ്ടോടാണ്ട് കുർബാന ചൊല്ലാൻ കാശു ത്യരുന്നെന് ഗ്യരന്റീ  ഒന്നു മില്ലെന്നോ?”

"ദൈവത്തിനു കൊടുക്കുന്നെനു എന്നാ ഗ്യാരന്റി"    “താനൊരു കാര്യം ചെയ്യ്‌! ചെന്നച്ച്ച്ശനോട് ഒരു വാക്ക് ചോദീര്”

അച്ഛൻ അല്പം റാഡിക്കൽ ആണ്. പുതിയതായി സ്ഥലം മാറി വന്ന ആളുമാ പോരെങ്കിൽ  ചെറുപ്പവും.

“അച്ശോ! എന്റപ്പന് വേണ്ടി ഒരു കുര്ബാന....”

“ഒറ്റ കുർബാനയാണോ അതോ പാട്ട് കുർബാന വേണോ”

“തമ്മിലെന്താ വ്യത്യാസമച്ശോ ?”

“വ്യത്യാസം ഒന്നും ഇല്ല. ഏതു കുർബാനക്കും ഫലം ഒന്ന് തന്നെ. ചേട്ടൻ ഒരു ഒറ്റ കുർബാന ചൊല്ലിച്ചാലും  മതി. അല്ലേൽ ഒരു കൂടു മെഴുകുതിരി പള്ളി നടയിൽ കത്തിച്ചേച്ചാമതി. കുർബാന എന്തായാലും ഞാൻ എന്നും കാലത്തെ ചൊല്ലുന്നുണ്ട്. ചേട്ടൻ വന്നു കണ്ടേച്ചു പൊക്കോ.

“രണ്ടായാലും അപ്പൻ സ്വർഗത്തിൽ പോകുവല്ലോ  അല്ലെ അച്ച്ശോ?”

“അപ്പൻ മരിച്ചിട്ടിപ്പം എത്ര ആയി?”  

“ഇത് പത്താമാണ്ടാ”  

“ഇപ്പം അപ്പൻ സ്വർഗത്തിലായിരിക്കും!”

“ഞാൻ ഗ്യാരണ്ടീ” എന്നച്ഛൻ പറഞ്ഞില്ലെന്നു മാത്രം.

“എന്നാപ്പിന്നെ എന്തിനാ വെറുതെ കാശു കളയുന്നെ”, കാശു കൊടുക്കാതെ കാര്യം കണ്ടതിന്റെ സന്തോഷത്തിൽ കറിയാച്ചൻ ഒരു കുപ്പി കള്ളും ഒരു കറിയും സ്പെഷ്യൽ വാങ്ങി കഴിച്ചുംവെച്ച്  അപ്പന്റെ ആൽമാവിനു ശാന്തി ലഭിക്കാനായിട്ടു  ഒരു "എത്രയും ദയയുള്ള മാതാവെ" ചൊല്ലി വീട്ടിൽ പോയി.